Segundo os datos sobre a aplicación do Réxime Europeo de Comercio de Dereitos de Emisión (RCDE), as dez industrias con maiores emisións de gases de efecto invernadoiro (GEI) lanzaron á atmosfera 3.218.896 toneladas durante 2025. Isto equivale ao 18,1% das emisións totais do país en 2023. Supón o 89,5% das emisións industriais galegas suxeitas ao RCDE.
Tres das cinco industrias galegas máis prexudiciais para o clima pertencen ao sector enerxético fósil. A refinaría de petróleo da Coruña (Repsol) e as centrais de ciclo combinado a gas fósil das Pontes (Endesa) e de Sabón (Naturgy) encabezan a listaxe de grandes emisores en 2025.
A planta de alúmina de San Cibrao (Alcoa) foi a cuarta maior emisora en 2025. Esta industria transforma bauxita importada desde Guinea, abastecendo a planta de aluminio coa que forma un complexo industrial. A planta de aluminio foi a sétima maior industria emisora en 2025, ano en que recuperou parte da súa actividade, despois dun parón.
A fábrica de hidróxeno cinsento de Meicende (Air Liquide), que emprega gas fósil (tamén chamado gas natural) como materia prima, foi a quinta maior industria emisora en 2025.
TOP 10 DE INDUSTRIAS EMISORAS DE GEI EN GALICIA (2025)
| Posición | Industria | Empresa | Sector | Emisións (toneladas) |
|---|---|---|---|---|
| 1 | Refinaría de petróleo da Coruña | REPSOL | Enerxía | 1.028.556 |
| 2 | Central eléctrica de gas fósil das Pontes | ENDESA | Enerxía | 638.450 |
| 3 | Central eléctrica de gas fósil de Sabón (Arteixo) | NATURGY | Enerxía | 443.658 |
| 4 | Planta de alúmina de San Cibrao | ALCOA | Químico | 319.548 |
| 5 | Planta de produción de hidróxeno fósil de Meicende (Arteixo) | AIR LIQUIDE | Hidróxeno | 213.220 |
| 6 | Fábrica de bioetanol de Curtis | VERTEX | Enerxía | 142.989 |
| 7 | Planta de aluminio de San Cibrao | ALCOA | Metalurxia | 103.324 |
| 8 | Magnesitas de Rubián | MGR | Minaría | 99.306 |
| 9 | Fábrica de silicio de Sabón | FERROGLOBE | Metalurxia | 87.860 |
| 10 | Industrias del Tablero (San Sadurniño) | INTASA | Madeireiro | 72.440 |
Na gráfica inserida máis abaixo pódese seguir a evolución das dez maiores industrias emisoras en 2025 desde o ano 2016. Salientamos a traxectoria da refinaría de petróleo de Repsol na Coruña, cuxas emisións anuais superaron ou rozaron sempre o millón de toneladas, agás nos anos 2020 e 2021, moi influídos polos efectos socioeconómicos da Covid-19.
A central de gas fósil (ciclo combinado) das Pontes, o segundo maior foco emisor en 2025, multiplicou por tres as súas emisións desde 2016. As baixas emisións desta central en 2020 débense a que estivo parada durante a maior parte dese ano, por causa de avarías e revisións.
Desde 2024 Repsol é a maior empresa emisora de gases causantes de cambio climático en Galicia.
(Actualización: abril de 2026).
Unidade
CO2 equivalente (CO2eq), que ten en conta a capacidade de xerar quecemento global dos GEI considerados, en relación ao principal deles, o dióxido de carbono (CO2).
Nota
Os GEI considerados no RCDE, de cuxa verificación de emisións proceden os datos, son o dióxido de carbono (CO2), os perfluorocarbonos (PFCs) na produción de aluminio e o óxido nitroso (N2O) na fabricación dalgúns produtos na industria química.
Fonte
Union Registry. Páxina web da Comisión Europea sobre o RCDE.
OGACLI 