Nos gases acidificantes inclúense o dióxido de xofre (SO2), os óxidos de nitróxeno (NOx) e o amoníaco (NH3). Son contaminantes de fácil dispersión que regresan á superficie provocando acidificación. Ademais, resultan determinantes na formación de partículas secundarias, preocupando especialmente o NH3, precursor das partículas máis prexudiciais para a saúde, as inferiores a 2,5 micras (PM2,5).
As emisións á atmosfera de gases acidificantes diminuíron en 733.853 toneladas (-83,4%) entre 1990 e 2024, ano máis recente con datos oficiais.
O grande responsábel da redución das emisións de gases acidificantes foi o sector enerxético, que pasou de achegar o 74,6 % das emisións en 1990 ao 0,9% en 2024.
As transformacións tecnolóxicas das centrais de carbón inducidas por cambios regulatorios e a substitución progresiva da súa produción eléctrica (culminada en 2023) son as causas principais da redución en 654.962 toneladas (-99,8%) das emisións de gases acidificantes do sector enerxético en 2024 en comparación con 1990.
A agricultura e a gandaría (mesmo sen ter conta a maquinaria agrícola, integrada en “transporte”) é na actualidade a maior fonte de gases acidificantes por causa das súas emisións de NH3, sendo responsábel do 67,1% das emisións totais. Séguea en importancia o transporte e a maquinaria móbil, neste caso polas emisións de NOX.
Todos os gases acidificantes reduciron as súas emisións entre 1990 e 2024, aínda que de xeito moi desigual.
Mentres as emisións de amoníaco (NH3), debidas case exclusivamente á produción agraria e gandeira, baixaron o 6,3% en 2024 con respecto a 1990, as de dióxido de xofre (SO2) e óxidos de nitróxeno (NOx) diminuíron no 98,7% e no 52,3%, respectivamente.
(Actualización: xullo de 2026).
Unidades
Toneladas de SO2 equivalente (gases acidificantes). Esta unidade permite agregar os gases acidificantes en función do seu grao de acidificación en relación ao dióxido de xofre (SO2), utilizándose para iso os factores de cálculo empregados pola Axencia Europea do Ambiente e Eurostat (SO2: 1; ; NH3: 1,9; NOx: 0,7).
Toneladas de SO2, NOx e NH3.
Fonte
Desagregación territorial para Galicia do Inventario estatal de Contaminantes Atmosféricos (1990-2024). Ministerio para a Transición Ecolóxica.
