Segundo os datos sobre a aplicación do Réxime Europeo de Comercio de Dereitos de Emisión (RCDE), as dez industrias con maiores emisións de gases de efecto invernadoiro (GEI) lanzaron á atmosfera 3.054.630 toneladas durante 2024. Isto equivale ao 15,7% das emisións totais do país en 2022. Supón o 87,5% das emisións industriais galegas suxeitas ao RCDE.
Tres das cinco industrias galegas máis prexudiciais para o clima pertencen ao sector enerxético fósil. A refinaría de petróleo da Coruña (Repsol) e a central de ciclo combinado a gas fósil das Pontes (Endesa) encabezan a listaxe de grandes emisores.
A planta de alúmina de San Cibrao (Alcoa) foi a terceira maior emisora en 2024. Esta industria transforma bauxita importada de Guinea, abastecendo a planta de aluminio coa que forma un complexo industrial. A planta de aluminio tamén adoita figurar entre os grandes emisores mais en 2022 iniciou unha parada da súa actividade que continuou en 2024.
A central de ciclo combinado a gas fósil de Sabón (Naturgy) ocupa o cuarto lugar. Tamén en Arteixo sitúase a planta de fabricación de hidróxeno cinsento de Meicende (Air Liquide), que emprega gas fósil (tamén chamado gas natural) como materia prima. Foi a quinta maior industria emisora en 2024.
A central de carbón das Pontes (Endesa), a maior fábrica galega de cambio climático entre a década de 1980 e 2020, que pechou definitivamente en outubro de 2023, non aparece por primeiro ano na lista de grandes emisores.
TOP 10 DE INDUSTRIAS EMISORAS DE GEI EN GALICIA (2024)
| Posición | Industria | Empresa | Sector | Emisións (toneladas) |
|---|---|---|---|---|
| 1 | Refinaría de petróleo da Coruña | REPSOL | Enerxía | 1.009.602 |
| 2 | Central eléctrica de gas fósil das Pontes | ENDESA | Enerxía | 578.671 |
| 3 | Planta de alúmina de San Cibrao (Cervo) | ALCOA | Aluminio | 399.403 |
| 4 | Central eléctrica de gas fósil de Sabón (Arteixo) | NATURGY | Enerxía | 319.548 |
| 5 | Planta de produción de hidróxeno fósil de Meicende (Arteixo) | AIR LIQUIDE | Hidróxeno fósil | 200.756 |
| 6 | Fábrica de silicio de Sabón (Arteixo) | FERROGLOBE | Metalurxia | 147.169 |
| 7 | Fábrica de bioetanol de Curtis | VERTEX | Enerxía | 142.650 |
| 8 | Magnesitas de Rubián | MGR | Minaría | 97.860 |
| 9 | Fábrica de produtos químicos de Mugardos | FORESTAL DEL ATLÁNTICO | Produtos químicos orgánicos | 93.371 |
| 10 | Industrias del Tablero (San Sadurniño) | INTASA | Madeireiro | 65.600 |
Na gráfica inserida máis abaixo pódese seguir a evolución das dez maiores industrias emisoras en 2024 desde o ano 2015. Salientamos a traxectoria da refinaría de petróleo de Repsol na Coruña, cuxas emisións anuais superaron ou rozaron sempre o millón de toneladas, agás nos anos 2020 e 2021, moi inflúidos polos efectos socioeconómicos da Covid-19.
A central de gas fósil (ciclo combinado) das Pontes, o segundo maior foco emisor en 2024, multiplicou por máis de sete as súas emisións desde 2015. As baixas emisións desta central en 2020 débense a que estivo parada durante a maior parte dese ano, por causa de avarías e revisións.
Por primeiro ano desde a década de 1980, Endesa non foi a maior empresa emisora de gases de invernadoiro en Galicia, pasando do primeiro ao segundo lugar. Repsol foi a maior empresa emisora en 2024.
(Actualización: abril de 2025).
Unidade
CO2 equivalente (CO2eq), que ten en conta a capacidade de xerar quecemento global dos GEI considerados, en relación ao principal deles, o dióxido de carbono (CO2).
Nota
Os GEI considerados no RCDE, de cuxa verificación de emisións proceden os datos, son o dióxido de carbono (CO2), os perfluorocarbonos (PFCs) na produción de aluminio e o óxido nitroso (N2O) na fabricación dalgúns produtos na industria química.
Fonte
Union Registry. Páxina web da Comisión Europea sobre o RCDE.
OGACLI 