Nos inventarios oficiais de Gases de Efecto Invernadoiro (GEI) elaborados no cadro da Convención de Cambio Climático das Nacións Unidas non se inclúen as emisións do transporte aéreo e marítimo internacionais. Esta regra contábel ten sido interpretada como un intento de agochar e eludir a achega á crise climática de dúas actividades chave para a globalización das cadeas produtivas e a internacionalización do turismo.
Malia o anterior, as emisións do transporte marítimo e aéreo internacional son calculadas polo Ministerio para a Transición Ecolóxica.
Na información que divulgamos desde o OGACLI sobre as emisións brutas totais, por habitante, por gases ou por sectores, só se inclúen as producidas en Galicia polo tráfico marítimo e aéreo con orixe e destino en portos ou aeroportos españois, pois son as que se teñen en conta actualmente no inventario oficial e no establecemento dos obxectivos autonómicos e estatais de redución de emisións.
Transporte marítimo
A consideración das emisións do tráfico marítimo internacional elevaría nun 6% as emisións totais en 2022 (+1.154.794 toneladas de CO2 eq). Estas emisións, moi superiores ás do tráfico marítimo español, son similares ás emisións da maquinaria agrícola e forestal para o mesmo ano.
Entre mediados da década de 1990 e de 2000 as emisións do tráfico marítimo internacional disparáronse, chegando a superar o millón e medio de toneladas. Desde aquela descenderon, até un mínimo dunhas 800.000 toneladas en 2020, ano marcado polos efectos da COVID-19. Desde 2000 volveron ascender, até unhas 1.150.000 toneladas en 2022.
Transporte aéreo
A diferenza do que acontece co tráfico marítimo, as emisións do transporte aéreo internacional son ben inferiores ás do tráfico aéreo español. En 2022 o tráfico internacional achegou 51.734 toneladas, máximo histórico.
As emisións do tráfico aéreo internacional en Galicia apenas deixaron de crecer entre 1990 e a queda do turismo internacional provocada pola COVID-19 en 2020 e 2021, recuperándose en 2022.
(Actualización: xullo de 2024).
Unidade
CO2 equivalente (CO2eq), que ten en conta a capacidade de xerar quecemento global de todos os GEI considerados, en relación ao principal deles, o CO2.
Nota
As emisións do tráfico martítimo e aéreo internacionais calculadas polo Ministerio para a Transición Ecolóxica inclúense no inventario de gases acidificadores, precursores de ozono e de efecto invernadoiro elaborado seguindo a nomenclatura SNAP (Selected Nomenclature for sources of Air Pollution). Esta difire da usada para o inventario orientado ao cumprimento das obrigas internacionais en materia de mitigación do cambio climático, que segue a nomenclatura CRF (Common Reporting Format).
Fonte
Táboa coa desagregación territorial para Galicia do Inventario de gases acidificadores, precursores de ozono e de efecto invernadoiro (Serie 1990-2022, nomenclatura SNAP). Ministerio para a Transición Ecolóxica.
OGACLI 