A maior parte dos recursos enerxéticos usados pola economía galega son de orixe fósil e proceden do exterior, sobre todo do Sur global, Rusia e os Estados Unidos de América (EUA). Galicia, como o conxunto de España e da UE, presenta unha elevada dependencia externa en termos de enerxía primaria.
A dependencia enerxética do noso país vese acentuada pola presenza dun potente sector enerxético fósil orientado en boa medida á exportación de enerxía final (produtos petrolíferos, electricidade,…) ao resto do Estado español e do mundo.
Desde 2005, a enerxía primaria importada supón máis do 70% do total da enerxía primaria empregada en territorio galego. En 2023, ascendeu ao 75,6%.
Se en lugar de considerarmos todo o uso de enerxía primaria en territorio galego se ten en conta o saldo neto (importado-exportado), descontando as exportacións, a dependencia enerxética en 2023 baixaría ao 59,6%.
A dependencia enerxética externa atinxiu o valor máximo (86,2%) en 2008, coincidindo co peche das minas de carbón das Pontes e Meirama e a posta en funcionamento da regasificadora de Mugardos.
(Actualización: maio de 2025)
Unidade
Porcentaxe de enerxía primaria importada sobre o total da enerxía primaria usada (%)
Nota
A partir de 2021, mudáronse varias das fontes de datos empregadas polo Instituto Enerxético de Galicia (INEGA), o que afecta fundamentalmente aos valores para a biomasa. Polo tanto, os datos anteriores a 2021 non son totalmente comparábeis cos datos a partir de 2021.
Fonte
Instituto Enerxético de Galicia (INEGA), Xunta de Galicia. Para 2016-2020, Consumo de enerxía primaria (versión 2024). Para 2021-2023, Consumo de enerxía primaria. Para o resto dos anos, balances enerxéticos anuais.
OGACLI 